सामान के साथ बरबाद जिन्दगी

सामान दिखाउत दुकान को नौकर
सामान दिखाउत दुकान को नौकर

महोबा शहर, खनगा बाजार। एते रानी हौजरी क्लाथ स्टोर ओर निदेश किराना स्टोर में 11 मार्च 2014 खा रात 12 बजे बिजली के तार से आगी लगी हे। जीमें लगभग एक करोड़ को सामान जल गओ हे। ईखी सूचना कोतवाली ओर लेखपाल खा दई हे।
रानी हौजरी क्लाथ स्टोर के मुनीम अखिलेख कुमार साहू ने बताओ कि जा दुकान दस साल से चलत हे। 11 मार्च 2014 खा हम रोज के जेसे रात आठ बजे दुकान बंद करके अपने घरे चले गये। 12 बजे रात में मोहल्ले के आदमियन ने फोन करो कि तुम्हाये दुकान में धुंआ उठ रहो हे। जभे तक हम आये तभे तक हमाओ सामान जल खे राख हो गओ हतो। हमने तुरतई आगी बुझाये वाली मशीन खा फोन करके बोलाओ । छह घंटा तक कड़ी मेहनत के बाद आगी बुझ पाई। आगी में हमाओ एक करोड़ को माल जल गओ हे। ईखी सूचना प्रसाशनिक अधिकारियन खा दई हे। लेखपाल जांच करन आओ हतो, पे अभे कछू भरोशा नई मिलो आय।
लेखपाल रामप्रसाद तिवारी ने बताओ कि में जांच करन गओ हतो। ऊ दोनऊ जनेन खा मिलाके लगभग सत्तर हजार रूपइया को नुकसान भओ हे। ईखी रिपोर्ट बनाके तहसील में दे दई हे।
महोबा कातवाली प्रभारी धरमराज यादव बताउत हें कि ऊने हम खा सूचना दई हती, पे कोनऊ खे रिपोर्ट नई लिखाई आय। ऊखे दुकान में बिजली से आगी लगी हे। जीमें हम कछू नई कर सकत हें।