साफ सफाई राखै मड़ई

1 taja kabar photo

जिला चित्रकूट, ब्लाक कर्वी, कस्बा रामघाट। हिंया मेहरियन का कपड़ा बदलै खातिर दुइ बरस पहिले कमरा बना रहै, पै वहिमा एक बरस से ताला लाग हवै। या कारन सैकड़न मेहरियन का परेशानी उठावैं का परत हवै। यहिके खातिर अबै तक कउनौ अधिकारिन से नहीं कहा गा हवै। 

अमावश के मेला मा शान्ती लखनऊ से रामघाट आई रहै। वहिकर कहब हवै कि मेहरियन का कपड़ा बदलै मा परेशानी आवत हवै। हजारन मड़ई घाट मा बइठ रहत हवै। दूसर बात मोबाइल भी इनतान के हवैं कि वहिमा फोटो खीची जा सकत हवै। या कारन मेहरियन का कपड़ा बदलै खातिर कमरा का ताला खुलै का चाही।
यहिनतान कहिन वीरेन्द्र अउर सतीश इनकर कहब हवै कि पहिले ताला खुला रहै, पै जबै से मड़ई वहिमा गन्दगी करत रहै तबै से ताला लाग हवै। सरकार का चाही कि वहिके देख भाल करै खातिर करमचारी का राखै साफ सफाई रहि। तबहिने मेहरिया कपड़ा बदल सकत हवै।
कर्वी एस.डी.एम. वीरेन्द्र कुमार गुप्ता का कहब हवै कि कपड़ा बदलैं खातिर मेहरिया हुंवा तक नहीं जात रहै। वहिमा मड़ई पेशाब अउर टट्टी करत रहै। यहै से ताला लाग हवै। मेहरियन का कपड़ा बदलै खातिर नदी के किनारे घाट मा फाइवर के डिब्बा धरा दीनगे हवैं।