सरकारी हैण्डपंप में दूषित पानी, कब तक पानी खरीदकर पिएंगे, अम्बेडकरनगर जिले के भीटी के निवासी

जिला अम्बेडकरनगर, ब्लाक भीटी, तहसील भीटी ब्लाक के तहसील मा पानी ईद कै चांद होइगा बाय। येही बढ़त गर्मी के साथ मनइन के दिक्कत भी बढ़ी गए बाय। काहे से जिले के हर हैण्डपम्प मा गन्दा पानी आवत बाय। सब बाहर से पानी खरीद के पियै का मजबूर अहैं। मनइन के कहब बाय की आखिर कब तक पानी खरीद के पिया जाय। हमरे सबके शिकायत का केहू सुनत नाय। हमरे सब हर बार प्रशासन कै दरवाजा खटखटावत हई। लकिन हर बार सिर्फ आश्वासन ही दिया जात बाय।
श्यामभवन पाण्डेय तहसील भीटी कै कहब बाय कि बराबर इहै आश्वासन मिलत बाय कि हमरे सब देखत हई व्यवस्था होय जाये। इहै साल भर से चलत बाय। आज तक व्यवस्था नाय भए।
जगदम्बा प्रसाद कै कहब बाय की सन 2007 मा पानी कै टंकी बनीं रही आज तक येहमा पानी नाय आय। न चलाय गए ना ही अधिकारी द्वारा यकै खबर लीन गए। तहसील मा जनता आवाथै पानी के कौनौ समुचित व्यवस्था नाय बाय। हैंडपम्प बाय जवन ख़राब बाय या गन्दा पानी दियत बाय।
सूर्य प्रसाद मिश्रा कै कहब बाय की हिया सब समस्या बाय। एक सौ मीटर अउर एक दुई सौ मीटर पै हैण्डपम्प बाय जवन गन्दा पानी दियत बाय।
दिनेश कुमार पाण्डेय कै कहब बाय की आश्वासन दिया जात बाय की रिबोर करवाय जाये। पाइप बदले बाटे लकिन जैसे पहले पानी आवत रहा वैसे आज भी आवत बाय। पानी कै जाँच भए बाय पियै लायक नाय बाय।

रिपोर्टर- प्रियंका

24/05/2017 को प्रकाशित