सफाई खा तरसत नाली

नाली ओर रास्ता खा जो हाल
नाली ओर रास्ता खा जो हाल

जिला महोबा, ब्लाक चरखारी, कस्बा खरेला मंगली बाजार। एते मंगली बाजार से लेके बस स्टैण्ड तक एक महीना से सफाई नई भई आय। जीखे कारन नाली कूड़ा से पूर गई हें।
नीलम ओर बिट्टू ने बताओ कि एते एक महीना से सफाई न होय खे कारन नालियन को गन्दो पानी रास्ता में फेलन लगो हे। गन्दगी के कारन इत्ती बदबू आउत हे कि द्वारे में बेठबो मुश्किल परत हे। सन्तोष बताउत हे कि मंगली बाजार से बस स्टैण्ड लगभग एक किलो मीटर हे। ओते तक सफाई कर्मी दो-चार दिन में झाड़ू भर लगा देत हे, पे निकरें वाले कूड़ा खा एते-ओते नालियन में गिरा देत हें। अगर सफाई कर्मी से नाली की सफाई करें खा कहत हें तो उल्टा हमई खा खिसियात हे। एई से जभे अपने द्वारे में गन्दगी नई देखी जात आय। तभे हम खुद नाली ओर रास्ता की सफाई कर लेत हें।
सफाई नायक धर्मेन्द्र सिंह ने बताओ कि मंगली बाजार से लेके बस स्टैण्ड तक सफाई कर्मी मनीराम ओर बल्ला सफाई करत हें। बाजार में दुकाने बने खे कारन मिट्टी नालियन में बुज जात हे। एई से नाली गन्दी दिखात हे। ई समस्या लगभग बीस दिन से हे। नई पेहले नाली की सफाई रोज हो हती।