सदर अस्पताल में दवाई के कमी

दवा काउन्टर पर लागल भीड़
दवा काउन्टर पर लागल भीड़

जिला सीतामढ़ी। सदर अस्पताल में दूर-दूर गांव से मरीज इलाज के लेल अबई छथिन। डाॅक्टर जाॅच कके दवाई लिख देई छई। लेकिन काउन्टर पर दवाई न मिलई छई। जेई कारण मरीज सब निराश हो जाई छथिन।
अस्पताल में आयल सुरसण्ड प्रखण्ड के मेतौना गांव के इंदू देवी कहलथिन कि हम  बुखार के इलाज करावे आयल छी। दु दिन हो गेल चालीस रूपईया खून जांच करावे में लागल लेकिन दवाई न मिलल त बाहर से खरीदली। रीगा प्रखण्ड के पन्नापुर गांव के सुमन कुमार कहलथिन कि हमरा बुखार लगईय। इलाज करावे सदर अस्पताल में अईली, डाॅक्टर देखलथिन लेकिन दवाई न मिलल। इ समस्या सब मरीज के साथ हई।
स्त्री रोग विशेषज्ञ डाॅक्टर सुधा झा कहलथिन कि जांच कके दवाई लिख देई छी। ओई के बाद दवाई मिलई छई कि न ओकर जिम्मेवार हम न छी।
जिला चिकित्सा पदाधिकारी (सी.एम.ओ.) डाॅक्टर अरविन्द कुमार गुप्ता कहलथिन कि दवाई के घोटाला होयल हई। ऐई के लेल हम दवा खर्च के ब्योरा जमा करवा रहल छी कि कहां पर केतना दवाई खर्च होयल हई अउर केतना दवा अभी बांकी हई। एकरा लेल छान बीन हो रहल हई।