सड़क में मिटटी का तेल! घोर मिलावट, चित्रकूट के कर्वी में गर्मीनो का आरोप

जिला चित्रकूट, ब्लाक कर्वी, कस्बा कर्वी हिंया के गांवन मा पहिले तौ सड़क बनाई नहीं जात हवै, बनाई जात हवै तौ घटिया सामान लगावा जात हवै गांवन के मड़ई कहत हवै कि बंधवइन से बरवारा तक डेढ़ किलोमीटर सड़क बनाई जात हवै। जेहिमा डामर मा मिट्टी का तेल मिला के लगावा जात है यहिसे सड़क बहुतै ख़राब बनी हवै।
शिकाइत करे मा सांसद भैरों प्रसाद मिश्रा सड़क का काम रुकवा दीन हवै । सुभाष चन्द्र अउर ईश्वर नाथ का कहब हवै कि सड़क बने का काम दुइ महीना पहिले शुरु कीन गा रहै। सड़क मा पहिले पानी नहीं डाला गा आय गिट्टी बस डाल के रोलर चला दीन गा हवै यहै कारन सड़क मा जघा जघा गड्डा हवै। ऊपर से डामर लगा दीन गा हवै। नवा रोड बनत हवै। पांच छह साल से हम हिंया से निकलत हन। बरसात मा दूसर रास्ता से निकलित हन।
मुनीम गोरेलाल बताइस कि गांव के मड़ई शिकाइत करिन हवै। तबै सांसद काम बंद करवा दीन रहै। फरवरी 2017से सड़क बने का काम शुरु कीन गा रहै। पूर सड़क मा गिट्टी पड़ गे हवै डामरीकरण का काम बचा हवै।
सांसद प्रतिनिधि सुशील द्विवेदी का कहब हवै कि बुन्देलखण्ड विकास निधि शिलान्यास कइत से डेढ़ किलोमीटर सड़क बनावै का रुपिया आवा रहै। खराब सड़क बने के कारन सांसद यहिमा रोक लगवा दिहिन हवैं अउर जांच का कहिन हवैं।

रिपोर्टर- नाजनी रिजवी

21/04/2017 को प्रकाशित