सजा मिलल, पेंसन बांकी

भीखारी राम
भीखारी राम

जिला सीतामढ़ी, प्रखण्ड, पंचायत, गांव बथनाहा पश्चिमी। इहां के भीखारी राम 1974 ई. में जे.पी. आन्दोलन में भाग लेले रहथिन। जेईमें उ लगभग छौ महिना बक्सर जेल में भी रहल छथिन। ओई जेल में रहे वाला लोग के सरकार पेंसन देवे के लागू कयले छथिन। लेकिन उ पेंसन उनका न मिल रहल हई।
भीखारी राम कहलथिन कि हम जयप्रकास आंदोलन में प्रखण्ड, चैक, बाजार सब जगह महंगाई के लेके घेराव कयले रही। जेईमें बथनाहा, पुपरी, रीगा, बैरगीनिया लगभग सीतामढ़ी जिला के सब प्रखण्ड मिलाके पांच बस लोग बक्सर जेल में पकड़ा के गेल रहई। जेल में रहे वाला सब लोग ढ़ाई हजार रूपईया मिले के रहई। लेकिन हमरा आई तक रूपईया न मिलल।
प्रखण्ड के बड़ा बाबू अरूण कुमार कहलथिन कि जईसे स्वतंत्रता सेनानी पेंसन लोग के मिल रहल हई ओही तरह नीतीश सरकार जयप्रकाश पेंसन योजना लागू कयले छथिन। जेईमें बक्सर जेल के प्रमाण-पत्र उनकरो नाम से आयल हई। ओई आवेदन के हम 11 मार्च 2014 के जिला में उनकर आवेदन भेज देले छी।
जिला सहायक समान्य प्रशाखा मोहम्मद इरफान कैसर जिला से राज्य में गृह विशेष विभाग में डेढ़ महिना पहिले आवेदन भेजल गेलई। उहां से स्वाकृति हो जतई तहिया से जोड़ के लगभग छौ हजार के महिना जब तक जिन्दा रहथिन तब तक मिलतई।