शब्बीर परिवार के मांगै

अनशन मा बइठ शब्बीर का परिवार
अनशन मा बइठ शब्बीर का परिवार

बांदा शहर, मोहल्ला अलीगंज, खूंटी चैराहा। हेंया के शब्बीर हत्याकांड के मामला का लइके उनके परिवार वाले 17 जून 2013 से बांदा अशोक लाट मा अनशन करे रहै। उंई आपन दुख के गोहार मुख्यमंत्री अखिलेश यादव का दे चाहत रहैं, पै 19 जून 2013 का जबै अखिलेश यादव आये, तबै कोतवाली पुलिस उनके घेराबन्दी कई लिहिस। यहिसे उंई होंआ तक न पहुंच पाये।
शब्बीर के मेहरिया नाजि़या बेगम बतावत है कि मोरे मनसवा का 27 मई 2013 का पुलिस अउर सपा के जिला अध्यक्ष शमीम बांदवी के मिली भगत से जितेन्द्र शर्मा, दिनेश उर्फ दिन्ना मिल के हत्या कई दिहिन रहै। जनता के सहयोग, प्रदर्शन अउर कोतवाली मा घेराव करैं के बाद 29 मई 2013 का रपट लिखी गे। 30 अउर 31 मई 2013 का कोतवाली के बाहर प्रदर्शन करैं के बाद हत्यारे पकड़े गे, पै अबै भी हमरे परिवार के जान का खतरा है। यहिसे हम कुछ मांगन का लइके अनशन कीन रहै। एस.डी.एम. माग पूरी करै का भरोसा दिहिस है।
एस.पी. उदय शंकर जयसवाल का कहब है कि या मामला के पूरी कारवाही होइगे है। उनके मांगन के बारे मा मोहिका पता निहाय।

   इं आहीं शब्बीर के परिवार के मांग

1-शब्बीर हत्या काण्ड के सी.बी.आई. जांच कराई जाय जेहिसे निष्पक्ष अउर सही जांच होई सकै। हत्यारन का सजा मिल सकै। 

2-शब्बीर के परिवार के सुरक्षा व्यवस्था कीन जाय।
3-पुलिस अधीक्ष्क का निलम्बित कइके बांदा जिला से हटावा जाय। काहे से पुलिस अधीक्षक के सउहें सही जांच सम्भव निहाय।
4-मृतक शब्बीर के दूनौं मेहरियन का बीस-बीस लाख रूपिया मुआवजा दीन जाय। जेहिसे अपने बच्चन का भरण पोषण कई सकैं।
5-परिवार के सुरक्षा खातिर शस्त्र लाइसेंस दीन जाय।
6-शब्बीर हत्याकाण्ड के दोषिन का निर्दोष होय का प्रमाण पत्र दे वाले सपा जिलाध्यक्ष शमीम बांदवी का अध्यक्ष पद से हटावा जाये।
7-शब्बीर हत्या कांड के मुल्जिम दिनेश शर्मा उर्फ दिन्ना का समाजवादी पार्टी से निकाला जाय।