व्यूअर चॉइस अवार्ड जीतकर फैजाबाद की दीपांशी ने किया जिले का नाम रोशन

फैजाबाद जिले के काश्मीरी मोहल्ला कै रहै वाली महज छह साल के दीपांशी सहाय राष्ट्रीय स्तर पै बुद्धिज्म ऑडिटोरियम लखनऊ मा 20 जनवरी को आयोजित मॉडलिंग, फैशन प्रतियोगिता फैसिनिस्टॉ 2018 मा व्यूअर चॉइस अवार्ड जीतके जिला कै नाम रौशन करिन।
दिपांशी सहाय माँडल कै कहब बाय की अवार्ड जीतके हमै बहुत बढ़िया लागत बाय हम बहुत खुश हई। हमार मम्मी बताइन सिखाइन वैसे-वैसे हम आगे बढ़ेन। हमैं कार्टून, सिंगिंग अउर डांस बहुत पसंद बाय।
दिपांशी सहाय कै अम्मा स्मिता श्रीवास्तव बताइन कि हमार कोशिश बाय कि आगे पढ़ाई जारी रहे ई नाय बाय कि पढ़ाई पै रोक लगाय दियब। माडलिंग के क्षेत्र मा भी आगे लै जाब। दिपांशी के ताई कई सारे प्रोडक्शन हाउस से माडलिंग कै प्रस्ताव भी आवत अहैं। हमैं बहुत गर्व बाय कि हमार छोटी सी बिटिया हमार नाम तौ रोशन करबै करिस साथ ही साथ पूरे जिले कै नाम रोशन करिस।
स्मिता श्रीवास्तव बताइन कि हम स्कूल मा पढ़ावत रहेन नौकरी छोड़के हम अपने गेदहरन का आगे बढ़ावे का सोचेन। हमैं यहि सब चीज कै बहुत शौक बाय। जब हम आगे नाय बढ़ पायन तौ अपने गेदहरन के जरिए ही अपने सपना का पूरा करब।

रिपोर्टर- कुमकुम

published on 25, jan