वर्षात में बढ़ जाई छई परेशानी

सड़क पर पानी के जमाव
सड़क पर पानी के जमाव

जिला शिवहर और सीतामढ़ी में गांव से लेके शहर तक जगह-जगह सड़क खराब हई। जेई कारण लोग सब के जाये-आवे में बहुत दिक्कत होई छई। अब वर्षात के समय आ गेलई जेई कारण जहां-जहां सड़क खराब हई उहां पानी के जमाव हो रहल हई। जेइसे अउर भी दिक्कत हो रहल हई।
सीतामढ़ी जिला के प्रखण्ड सोनबरसा, गांव फरछहिया मेन रोड सड़क से स्लेश स्थान तक लगभग सौ मीटर तक सड़क खराब हई। उहां के लोग देवेन्द्र दास, रामपुकार महतो कहलथिन कि इ रास्ता से बस, मोटरसाइकल से हर समय लोग के आवागमन हई। घुटना भर कादो के कारण दोसरा के दरवाजे से होकर जाये परई छई। जेइ कारण हमेषा घटना होइत रहई छई। इ सड़क पर कोई अधिकारी के ध्यान न हई।
मुखिया माया देवी कहलथिन कि इ गांव के सड़क न हई न त कहिया बना देले रहतियई। इ आर.ई.ओ. के द्वारा बनायल जतई। रीगा प्रखण्ड के पटनिया गांव में किशोरी राय के दरवाजा से लेके लक्ष्मी राय के दुकान तक लगभग सौ मीटर तक सोलिंग न होयल हई। ऐई सही भगवानपुर पंचायत के हनुमान नगर गांव में छः साल से सोलिंग खराब हई।
कार्यक्रम पदाधिकारी कृपाशंकर झा कहलथिन कि पंचायत में रूपईया आयला के बाद बना देल जतई। ऐई सही शिवहर जिला के निमाही और सरवरपुर गांव में सड़क खराब हई जेई कारण उहां के लोग कहलथिन कि भर घुटना पानी हेल के आवे-जाये परई छई। मुखिया उपेन्द्र साह कहलथिन कि पहिले वाला पंचायत सचिव के द्वारा वजट पास हो गेल हई।
प्रखण्ड विकास पदाधिकारी साह रजा हुसैन कहलथिन कि पंचायत में विकास के लेल ग्राम पंचायत स्वतंत्र हई उ कोई भी योजना से काम करवा सकई छथिन।