ललितपुर जिले के कुम्हैड़ी गाँव में मनरेगा मजदूरों को छह साल से नहीं मिली मजदूरी

जिला ललितपुर, ब्लाक महरौनी, गांव कुम्हैडी कुम्हैडी में केऊ मजदूरन ने नरेगा को काम करो लेकिन छह साल होबे के बाद भी उनकी मजदूरी के रुपइया नइ मिले। प्रधान से लेके बीडिओ तक शिकायत करी लेकिन कछू सुनवाई नइ हो रई।
प्रधान प्रभुदयाल को केबो हे के सही में आदमी रुपइयन के लाने परेशान हे। ऊपर से रुपइया नइ आ रओ तो किते से देबे।
बीडिओ पी एन द्विवेदी को केबो हे के उनके पास कोनऊ शिकायत नइ आई। जांच करी जेहे अगर जांच में सही पाओ जेहे तो सबकी मजदूरी मिल हे।
भोलेराम ने बताई के हमने चौसठ दिन मजदूरी करी ती जीमे से अठाईस सौ मिले और अबे बयालीस सौ कछू बाकी हे। अब हम अपनों खर्च एसे चला रए अगर कितऊ मजदूरी लग जात तो चले जात करयात। उन ने हाजरी एक कोरी किताब पे चढ़ाई ती और जो भी नइ बताई ती के तुमाई इतनी हाजरी हे।
रामकुंवर ने बताई के जीके कुंआ खुदे ते कट ते हम घर से देहे अगर प्रधान नइ देहे तो अब मजूरी कर कर के अपने मोड़ी मोड़न को पेट पाल रए।
भागचन्द्र ने बताई के जितने आदमियन ने काम करो तो सबके रह गये। हमाय तो पन्द्रह दिन के हे।बे भी नइ मिले अबे।

रिपोर्टर- सुषमा

17/05/2017 को प्रकाशित