लड़ाई के बाद मउत

जिला बांदा, ब्लाक बबेरू, कस्बा मुरवल। हेंया के मड़इन के बतावैं के हिसाब से नाली निकासी का लइके मोहल्ला के बिहारीलाल, प्रेमनारायण अउर गयापाल के बीच मारपीट भे। दुई दिन के बाद गयापाल के मउत होइगे। पुलिस धारा 304 (गैर इरादतन हत्या) के तहत कारवाही करिस है।
गयापाल का छोट भाई छोटेलाल का कहब है कि 14 दिसंबर का शाम साढ़े छह बजे लड़ाई होय लाग। काहे से हमार घर के नाली बिहारी लाल अउर प्रेमनारायण बांध दिहिन रहैं। घर का पानी नहीं निकर पावत रहैं। हम मना कीन तौ उंई लाठी डण्डा लइके आ गे अउर मारपीट करिन। मोरे भाई गयापाल के बहुतै गम्भीर चोटैं आई हैं। दुई दिन तक अस्पताल मा इलाज चला अउर वहिके बाद मउत होइगे। मैं बबेरू कोतवाली मा रपट लिखाये हौं।
बिहारीलाल कहिस कि गयापाल दुई महीना से बीमार रहा है या मारे मउत भे आय। हम यतना नहीं मारा की वा मर जाय। बबेरू कोतवाली के दीवान उमाकान्त गौतम बताइन बिहारीलाल के खिलाफ धारा 304 (गैर इरादतन हत्या) के तहत मुकदमा लिख गा है। पोस्टमार्टम रिपोर्ट आवैं के बाद आगे के कारवाही कीन जई।