रास्ता मे लगो हैण्डपम्प मचत गिलाओ

जिला महोबा, ब्लाक चरखारी, गांव गौरहारी पालन को मोहल्ला ई गांव की मेंन रास्ता मे हैण्डपम्प लगो हे। जीसे पूरो पानी रास्ता मे फेलत हे। कच्ची रास्ता होंय के कारन गन्दगी मचत हे। आदमी रात बिरात निकर नईं पाउत हे।
प्यारे राजपूत, सन्तोष पुजारी ओर रवि कुमार बताउत हे की हमाये एते की जा रास्ता दस साल से खराब हे। ई रास्ता से दिन भरे मे डेढ़ सौ आदमी निकरत हे। पूरे रास्ता पे गन्दो पानी के कारन गिलाव मचत हे। जीसे निकरे मे परेशानी होत हे।
मानसिंह कहत हे की सबसे ज्यादा ओरतन खा परेशानी होत हे। काय से पानी जा हार खेत को ज्यादा काम ओई देखत हे। पानी के तीन-तीन बर्तन लेके निकरत हे। जीसे पैर फिसले से गिरें को डर लगो रहत हे। हम पूर्व प्रधान से भी कहत-कहत थक गये हते। ई प्रधान से भी कहत हे की रास्ता बनवा देय, पे ऊ नईं सुनत हे।
रविन्द्र पाल कहत हे की हमाये बच्चा स्कूल के लाने निकर नईं पाउत हे। गोद मे लेके निकारनक परत हे। अभें तो ठीक से बरसात मे बूढ़े बच्चा टट्टी पेशाब खा तरसत हे। सोचत हे की रास्ता बन जाये तो नींक हो हे। पे हम गरीबन की कोनऊ सुनवाई नई होत हे।
प्रधान राजू राजपूत बताउत हे की अभे मेने एकऊ रास्तन को प्रस्ताव नई बनाओ हे। अभे पानी की परेशानी हे। जीसे हैण्डपम्प लगवायें के लाने परेशान हे। ईखे बाद रास्तन खा सोचो जेहे।

रिपोर्टर – सरोज सैनी