रास्ता बनी नदी, कहां से निकरै मड़ई

DSCN6629जिला चित्रकूट, ब्लाक कर्वी, गांव कसहाई, लोधन पुरवा मा ज्ञान भारती स्कूल के लगे नाली कूड़ा से भरी हवैं। जबै कि हिंया सांसद से लइके विधायक तक के आवा जाही रहत हवै,पै रोड मा गंदा पानी भरा रहत हवै। का उनका येत्ती गम्भीर समस्या खातिर कत्तौं ध्यान नहीं जात। नाली के सफाई करावैं खातिर प्रधान से लइके शासन तक 18 नवम्बर 2014 का कहा गा, पै ध्यान नहीं दीन गा।
ज्ञानभारती स्कूल मा पढ़ै वाले श्याम अउर रूबी कहत हवैं कि गंदे पानी से हइल के निकरैं का परत हवंै। हमार ड्रेस खराब होइ जात हवै। छोट-छोट बच्चा गंदे पानी मा गिर भी जात हवै। येत्ती गम्भीर समस्या होय के बादौ रास्ता का पानी निकरावैं खातिर प्रधान सुरेश चन्द्र अउर शासन कउनौ ध्यान नहीं देत।
पुरवा के कमला अउर रानी कहिन कि हमरे घर का आवैं जायें खातिर अउर कत्तौ से रास्ता नहीं आय। बारह महीना रास्ता मा पानी भरा रहत हवै। यहै से कीड़ा पतीरा के काटैं का डेर रहत हवै। शहर से लाग पुरवा का इनतान का हाल हवै, पै प्रधान से लइके शासन तक के अधिकारिन के कान मा जूं तक नहीं चलत आय।
प्रधान सुरेश चन्द्र का कहब हवै-” नाली के सफाई करवा देहूं। मड़ई ख्ुादै नाली मा कूड़ा डारत हवै।” कर्वी ब्लाक के ए.डी.ओ. सुखलाल कहिन कि नाली के सफाई करवावैं खातिर प्रधान से कहा जई।
ब्लाक रामनगर, कस्बा राजापुर, गांव भंभेट। हिंया के रानी, चुनकी अउर प्रेमा का कहब हवै कि नाला के सफाई नहीं होत हवै। यहै से नाला मा गंदा पानी बजबजात हवै। नाला के सफाई करवावैं खातिर राजापुर टाउन एरिया मा 22 नवम्बर 2014 का कहा गा, पै ध्यान नहीं दीन गा।
राजापुर टाउन एरिया के चेयरमैन लक्ष्मी प्रसाद का कहब हवै कि नाला के सफाई दिसम्बर तक करवा दीन जई।