रास्ता बनवाये की करत मांग

जिला महोबा, ब्लाक कबरई, गांव बिलबई को मजरा दिसरापुर। एते की लगभग डेढ़ किलो मीटर सड़क बोहतई खराब हे। बरसात में पानी भरे के कारन लड़का-लड़की स्कूल नई जा पाउत हें। जीसे आदमी रास्ता बनवायें की मांग करत हंे।
गांव के लक्षमण कुशवाहा, भगतराम रैकवार ओर भूपसिंह ने बताओ कि हमखा ई गांव में रहत बीसन साल हो गये हें। कभऊं जा रास्ता नई बनी आय। गर्मी ओर ठन्डी में तो ठीक हे, पे अगर तनकऊ पानी बरस गओ तो निकरब मुश्किल पर जात हे। कच्ची रास्ता में निकरे से पांव फिसल जात हे।
हरगोविन्द, राकेश ओर चितराम ने बताओ कि रास्ता में पानी भर जात हे। जीखे कारन हमाये बच्चा दो-दो दिन स्कूल नई जा पाउत आय। रास्ता बनवाये खे लाने हमने केऊ दइयां तहसील दिवस में दरखास दई हे, पे आज तक रास्ता बनवाये खे लाने प्रधान एकऊ ध्यान नई देत आय।
प्रधान हीराबाई के आदमी जमुना प्रसाद ने बताओ कि आधी रास्ता ग्राम पंचायत ओर आधी नगर पालिका में आउत हे। बीच में रेलवे क्रासिंग परत हे। हमाये खाता में इत्तो रुपइया नइयां कि ऊ रास्ता बनवा सकन।
कबरई ब्लाक के ए.डी.ओ. सुरेश मिश्रा ने बताओ कि हमने ओते जांच करी हे। ऊ रास्ता सिंचाई विभाग के तहत आउत हे। ओतई से बनवाई जेहे। सिंचाई विभाग में बात करें पे कोनऊ सन्तोष जनक जवाब देही नई दई गई हे।