ये है चित्रकूट जिले के सांसद भैरों प्रसाद का गोद लिया गाँव, हन्ना बिनैका

जिला चित्रकूट, ब्लाक रामनगर, गांव हन्ना बिनैका दुइ साल पहिले या गांव का सांसद भैरों प्रसाद गोद लिहिस रहै। वा समय गांव का आदर्श मांडल बनावै खातिर बहुतै वादा कीन गा रहै। पै अबै भी गांव मा रास्ता ,पानी,पेंशन ,शौचालय जइसे न जाने केत्ती समस्या से मड़ई जूझत हवैं। या गांव विकास से अबै भी कोसन दूर हवैं।
अनिल कुमार शुक्ला बताइस कि पांच हजार के आबादी वाला हमार गांव मा कुछौ विकास नहीं आय। खडंजा पानी अउर शौचालय के बहुतै समस्या हवैं विनोद कुमार का कहब हवै कि यहिसे मड़ई अउर जानवर सब का परेशानी होत हैं। सांसद टंकी बनवावै का कहिन रहै पै अबै तक नहीं बनी आय।
धर्मेद्र कुमार शुक्ला बताइस कि मोहिका हिंया रहत चालिस साल होइ गे हवै पै अबै तक गांव के नाली नहीं बनी आहीं न इनमा सफाई होत आय। जउन नाली बनी हवै उंई खुली हवै जेहिसे किरवा बुजबुजात रहत हवैं। दुखिया बताइस कि गांव मा अस्पताल नहीं बना आय जेहिसे डिलेवरी खातिर दूसर गांव जाये का पड़त हवैं। गांव मा डिलेवरी करावे मा पांच सौ से पन्द्रह सौ रुपिया तक लइ लेत हवैं।
प्रधान पति मिथलेश राम त्रिपाठी का कहब हवैकि जबै बजट आ जई तौ सब काम पूर करवा जई। सांसद प्रतिनिधि सुशील दिवेदी का कहब हवै कि गांव के विकास के योजना बनावत एक साल का समय लाग जात हवैं। मई से योजना के हिसाब से काम शुरू होइ जई। गांव मा रास्ता,पानी, शौचालय ,स्कूल सब बनवायें जइहैं। पोस्ट आफिस भी बनवावा जई जेहिसे गांव का आदर्श मांडल बन सकै।

रिपोर्टर- सहोद्रा

03/02/2017 को प्रकाशित