मास्टर के करत मांग

नरेश दत्त
नरेश दत्त

जिला चित्रकूट, ब्लाक रामनगर, गांव पिपरौंद। हिंया के जूनियर स्कूल मा नरेश दत्त हेडमास्टर हवै। उंई स्कूल मा दस बरस से बच्चन का अकेले पढ़ावत हवैं। मास्टर के मांग खातिर कइयौ दरकी रामनगर बी.आर.सी. विभाग मा लिखित भी दिहिन हवैं, पै कउनौ सुनवाई नहीं भे आय।
या समस्या का लइके रामनगर बी.आर.सी. विभाग मा बात कीनगे। विभाग के समन्वयक अखिलेश कुमार पाण्डेय का कहब हवै कि जबै सरकार कइती से मास्टरन के भर्ती होइ। तबहिने मास्टरन के कमी पूर होइ सकत हवै।
जूनियर स्कूल के हेडमास्टर नरेश दत्त का कहब हवै कि दस बरस से अकेले बच्चन का पढ़ावत हौं। ऊपर से कइयौ कागजी काम अउर मीटिंग मा भी जाये का परत हवै। अगर कागजी काम करत हौं अउर मीटिंग मा जात हौं तौ बच्चन का पढ़ा नहीं पावत हौं। अगर स्कूल मा दूसर मास्टर होय तौ बच्चन के पढ़ाई का नुकसान न होइ।
स्कूल मा पढ़ै वाले बच्चन का कहब हवै कि मास्टर अकेला पढ़ावत हवै। ऊपर से वहिका कइयौ काम देखैं का परत हवै। वा हमका काम दइ देत हवै। कत्तौ-कत्तौ सबै बच्चन का एकै साथ बइठा के पढ़ावत हवै।