मां-बाप का रो-रोकर बुरा हाल, बांदा जिले में मासूम सी शिवानी चढ़ी दहेज़ की भेंट

साल भर पहिले शादी भे रहै पै जिन्दगी के सांस रुक गें। बांदा जिला के तिंदवारी के शिवानी के हत्या से पूर जिला मा डेर का माहौल है। या घटना दहेज के साजिश आय या मेहरिया मनसवा के बीच लड़ाई का नतीजा आय।
शिवानी के महतारी विजयलक्ष्मी का कहब है कि सास,ससुर ,देवर अउर आपन मनसवा, सबके कपड़ा मोर लड़की धोवत रहै अउर घर का सब काम करत रहै पै ससुराल वाले मोर लड़की का मार डालिन हैं।
शिवानी का भाई रवि प्रसाद गुप्ता बताइस कि दुइ-दुइ मोबाइल मोर बहिनी के ससुराल वाले फोड़ डालिन फेर से नौ हजार का मोबाइल दीने रहे हन तौ वा स्विच आफ बतावत हैं। मोर बहिनी का रात के जान से मार डालिन हैं।
शिवानी का बाप सुरेश गुप्ता का कहब है कि दहेज मा चार पहिया मांगत रहै।
सास मुन्नी गुप्ता बताइस कि मइके वाले झूठ बोलत हैं।
ससुर श्यामलाल गुप्ता बताइस कि दरवाजा बंद कइके आगी लगाइस है अउर कुछौ नहीं करिस आय।
तिंदवारी एस.ओ. प्रतिभा सिंह का कहब है कि अपराध संख्या 16 धारा 498 बी/304 घ व 4/3 दहेज उत्पीड़न के अधिनियम के तहत चार मड़इन के खिलाफ मुकदमा लिख लीन गा हैं।

रिपोर्टर- शिवदेवी

 Published on Feb 12, 2018