महोबा के गौरहारी में सड़क बनी नाला

जिला महोबा, गांव गौरहारी की सड़क की हालत नाली बन गई। इते दो महीना से सफाई नइ भई जासे नाली को पानी सड़क पे बे रओ।
आदमियन को आरोप हे के अगर सफाई कर्मी से सफाई करबे की कओ तो बे कत के हमे गांव की नइ ब्लाक की सफाई करने। प्रधान से भी शिकायत करी लेकिन अबे तक कोनऊ सुनवाई नइ भई।
उमा ने बताई के पूरे सड़क पे कीचा मची रत निकर तक नईइ पात। मोड़ी मोड़ा हे सो गिर गिर परत कपडा गंदे हो जात सबरे।
संतोष रानी ने बताई के भोत कीचा मची रत हमाय ते एक दिन हमाई चप्पल सरक गई ती सो हमाय अमरूदन की डलिया गिर परी ती हम अमरुद बेचबे जा रए ते।
आशाराम ने बताई के हमाय ते जइ से इतनो मलेरिया फ़ैल रओ। अगर सफाई होबे तो न जे मच्छर हुए न बीमारी फैले। शाम के इतने मच्छर काठत के बैठ तक नइ पात।
राजू राजपूत प्रधान ने बताई के अबे दो चार महीना से सफाईकर्मी अबे आय नइया। लेकिन अब हम ने कह दई के हर हफ्ता एक एक दिन एक एक मुहल्ला में सफाई करबे जाओ।
गांव हे भोत और सफाईकर्मी हे दो सो परेशानी होत। हमने मांग भी करी के दो सफाईकर्मी और बढ़ा दो लेकिन नइ बढ़ा रए।

रिपोर्टर- सरोज सेनी

17/12/2016 को प्रकाशित