मनई पै हमला

जिला अम्बेडकर नगर, ब्लाक कटेहरी, ग्रामसभा धरमा मुबारक पट्टी, गांव षुकुलपट्टी। हिंआ थाना मा रिपोर्ट लिखावै जात रहे मनई का चाकू से करिन घायल, मेहरारु से छेड़छाड़ करै वालेन से विरोध करिन तौ जान से मारै का मिली धमकी। 11 जून 2014 कै बाजार से लउटि के घरे आवत रहिन पति-पत्नी से चार मनई करिन छेड़छाड़। अकबरपुर थाना मा मेहरारु अउर पति का चार घंटा बैठाये रहिन फिर 11 बजे रात मा थाना से भगाए दिहिन।
मेहरारु कै पति बताइन कि 11 जून का पहितीपुर बाजार गै रहेन। मेहरारु भी साथे मा रही बाजार से जब घरे आवत रहेन। फुलवरिया बाग के लगे पहुचेन तौ चार मनई आइन मेहरारु के साथ छेड़खानी करै लागिन तौ हमका बहुत बुरा लाग।
12 जून कै जब सबेरे छह बजे फिर रिपोर्ट लिखावै जात रहेन तौ चारव मनई गांव के कुछ दूर पै घेर लिहिन कहिन रिपोर्ट लिखावै न जा। उनकै बात नाय मानेन तौ गाली गलौज दियै लागिन। तब तक एक मनई चाकू निकारि के मारै लाग। गोहार लगाय के बाद गांव वाले दौडि़न। गांव वालेन का आवत देखिन तौ भाग लिहिन। मौके पै पहुंच के अकबरपुर पुलिस जिला अस्पताल मा भर्ती कराइन। गांव कै मनई बताइन कि अगर पहिले दिन एफ.आई.आर. दर्ज होइगा हुवत तौ ई नौबत न आवत।
अकबरपुर कै एस.ओ. सोमेष्वर सिंह बताइन कि जानकारी मिली बाय। एन.सी.आर. दर्ज भै बाय आरोपी के खिलाफ जल्दी ही कार्यवाही कै जाये। अउर उनके साथी के नाम रिपोर्ट दर्ज भै बाय। बन्दन सिंह गिरफतार हईन। उनके साथी के तलासी कै जात बाय जल्दी ही उनके सब भी पकड़ा जइहैं।