बी.डी.ओ. से विकास काम के मांग

pauharजिला बांदा, ब्लाक नरैनी, गांव पौहार का मजरा कुम्हार पुरवा। हेंया के मड़ई बताइन कि या पंचवर्षीय भी खतम होय वाली है, पै विकास के नाम मा एर्क इंट तक नहीं रखी गे आय। गांव के मड़ई मिल के 2 दिसंबर का नरैनी बी.डी.ओ. का दरखास दइके विकास करावैं के मांग करिन हैं।
मुन्नी, सुमन, चम्पा अउर रानी का कहब है-“छह सौ आबादी का पुरवा है। कुम्हार अउर कुछ दलित जाति के मड़ई रहत हैं। बिजली, पानी, आवास, शौचालय, नाली, खड़ण्जा, पेंशन, राशन कार्ड जइसे का विकास निहाय।”
प्रधान शियाप्यारी का मनसवा छेदीलाल कहिस कि वा पुरवा मा पचीस हैण्डपम्प, पचीस शौचालय अउर बागै नदी के ऊपर पुल बनैं का प्रस्ताव बना के नवम्बर 2014 मा ब्लाक अउर सचिव के पास जमा करेंव। यहिके पहिले अउर विकास करावैं खातिर प्रस्ताव जमा कई चुके हौं। प्रस्ताव नहीं पास कीन जात आय।
नरैनी ए.डी.ओ. पंचायत ललित देवी कहिन कि निर्मल भारत अभियान के तहत शौचालय सिर्फ लोहिया गांव का दीन जात है। गांव मा शौचालय का बजट डी.पी.आर.ओ. के पास आवत है। जउन ब्लाक के तहत विकास है वा प्रस्ताव पास कीन जा सकत है।