बी.एल.ओ. पे नाम काटे को आरोप

gao se votar list se kate nameजिला महोबा, ब्लाक जैतपुर, गांव मोहारी। एते के साठ आदमियन को आरोप हे कि गांव के बी.एल.ओ. रामकुमार ने हमाये बोटा लिस्ट से नाम काट दये हे। जीखी दरखास एक हफता पेहले कुलपहाड़ एस.डी.एम. खा दई हे।

पचास साल को रामेश्वर ओर ब्यालिस साल को बलराम बताउत हे कि हम तीस साल से बोट डारत आये हे। ई साल गांव को जोन बी.एल.ओ. हे, ऊ प्रधानी को चुनाव लड़े चाहत हे। एई से हमाये लिस्ट से नाम काट दये हे।

विमला, कमला, पूजा, धमेन्द्र ओर कमलेश को आरोप हे कि हमाये सूची से नाम काट के अपने पार्टी के आदमियन के नाम जोड़ दये हे। हमाये एते से नाम काटे जात हे तो हम किते के हो हे। जभे कि पिछली लिस्ट में नाम चढ़े हे।

बी.एल.ओ. रामकुमार बताउत हे कि जोन आदमी गांव में नई रहत हे, मर गओ हे जा फिर जोन लड़की की शादी हो गई हे। ओई नाम काटे गये हे।
एस.डी.एम. मोहम्मद रिजवान बताउत हे कि दरखास मिली हे। हमने सबसे कहो हे कि दुबारा से वोटर लिस्ट को फारम भर के जमा कर देय तो नाम आ जेहे।