बिंन बारिस, पानी से लबालब भरी सड़कें

सड़क बनी हे तालाब
सड़क बनी हे तालाब

जिला महोबा, ब्लाक चरखारी, कस्बा खरेला। एते सिंचाई विभाग की लापरवाही तभे साफ नजर आउत हे। जभे खरेला कस्बे की बाजार की पूरी सड़कें पानी से लबालब भरी हें, ओर आदमी एसे ठंडे मोसम में गले पानी से हेल खे निकरत हे।
राजेन्द्र ओर कृष्ण कुमार के साथे दसन आदमियन ने बताओ कि खरेला रजवाहा लगभग पचीस साल को निकरो आय। अभे तक सिंचाई विभाग वाले पानी नई छोड़त हते, ओर किसान आपन खेती सींचे खा परेशान रहत हतो, पे ई साल तो पानी खे हद कर दई। काय से ई साल नहर में इत्तो पानी छोड़ दओ हे कि नहर से बाहर आके पानी सड़कन से पूरे कस्बे में भर गओ हे।
एसई पप्पू बताउत हे कि ई पानी से बिन बारिस पूरो कस्बा पानी से शराबोर हे। सबसे ज्यादा परेशानी एते पढ़े वाले बच्चन खा आउत हे। काय से जित्ते भी स्कूल हें, ऊ एतई हें। एसी ठंडी में बच्चन खे जूता मोजा भीज जात हें, ओर पूरो दिन ओई खा पेहरे रहत हें। सिंचाई विभाग में केऊ दइयां रजिस्ट्री ओर फोन करके सूचना दई हे, पे सिंचाई विभाग वाले कछू ध्यान नई देत आय।
जभे कि पानी पन्द्रह दिन से एसई भरो हे। जीसे लगभग दो सौ दुकानन खे साथे हजारन आदमी परेशान हें। एई से हम चाहत हें कि नहर खे पानी खा केसऊ भी रोक दओ जाय तो नींक हो जेहे।
सिंचाई विभाग के ड्राफ्टमैन भागीरथ वर्मा ने कहो कि में खरेला के जेई शिवलाल खा बोला खे आदेशित करहों। जल्दी नहर को पानी रोकवा दओ जेहे।