बाल्टी, डिब्बा लें हिंया हुंवा घूमै का परत पानी खातिर

pani-samasya-chitrkoot--wwwजिला चित्रकूट, ब्लाक कर्वी, गांव कपसेठी, दलित बस्ती। हिंया एक हैण्डपम्प लाग रहै वहौ तीन महीना से खराब हवै। यहिसे पानी खातिर लगभग सौ मडई बाल्टी डिब्बा लीने आधा किलो मीटर दूर गांव के भीतर लाग हैण्डपम्प मा पानी भरैं जात हवै। हैण्डपम्प सुधरावैं खातिर प्रधान मुन्ना लाल से 6 फरवरी का कहा गा हवै।
नत्थू अउर शिवकुमारी का कहब हवै कि आपन काम धंधा छोड़ के पानी लइत हन। हैण्डपम्प मा पानी भरैं खातिर घंटन लाइन लगाये रहित हन कन्तौं तो पानी भरें मा मडइन से गाली गलौज भी होई जात हवै। हमरे खातिर पानी तौ शर्बत होइगा हवै अगर हैण्डपम्प बन जाये तो पानी के समस्या से न जूझैं का परें।
प्रधान मुन्ना लाल का कहब हवै कि हैण्डपम्प बनवावै खातिर ब्लाक ए.डी.ओ. सुरेश चन्द्र से कहे हौं। काहे से कि अबै मैं प्रधान पद के शपथ नहीं गृहण कीनें आहूं।
ए.डी.ओ. सुरेश चन्द्र का कहब हवैं कि हैण्डपम्प बनवावाब जई का काम आय। अबै सरकार कइती से बजट नहीं आवा आय यहिसे हैण्डपम्प नहीं बना आय।
ब्लाक रामनगर कस्बा रामनगर दलित बस्ती हिंया के मडइन का कहब हवै कि उनके बस्ती मा एक कुंआ हवै वहिसे पानी भरत रहन पै अब वा कुआ सुखा गा हवै। यहिसे पानी भरैं खातिर पूर्व माध्यमिक स्कूल जाये का परत हवै। हैण्डपम्प लगवावैं खातिर रामनगर ब्लाक मा 6 फरवरी का कहा गा उंई भरोसा दिहिन हवैं कि हैण्डपम्प लगवा दीन जई। बस्ती के मीना सोना देवी बदलूराम संतोष देवी अउर छेदीलाल का कहब हवै कि बस्ती के आबादी लगभग
दुइ सौ हवै। हैण्डपम्प एकौ नहीं लाग हवै एक कुंआ रहै वहिसे पानी भरत रहन पै वहौ सुखा गा हवै। आधा किलो मीटर दुर पूर्व माध्यमिक स्कूल पानी भरैं जात हन अउर कउनौतान पानी लइ आवत हवै पै जानवर पियासे रही जात हवै। काहे से कि जानवरन का एक दरकी दुइ दुइ बाल्टी पानी पियैं मा लागत हवै ,तौ दिक्कत परत हवै। रामनगर ब्लाक के ए.डी.ओ. चन्द्रभान का कहब हवै कि हैण्डपम्प लगवा दीन जई। अगर कुंआ मा गंदगी हवै तौ वहिके भी सफाई करवा दीन जई।