बांदा जिले में लगी आग, कर गई दो गांवों को खाक

जिला बांदा मा आगी लागे से दुई घटना होई गई है, दूनौ घटना का कारन बिजली आय। पहली घटना तिंदवारी ब्लाक के छापर गांव बिजली के तार टूटे से पांच बीघा खेत के खड़ी फसल जल गें है, या खेत रामपाल सिंह का आय।
रामपाल सिंह बताइस कि मोर चार-पांच बीघा के खेती जल गें है। सुनील का कहब है कि तार फाल्ट मारत है तौ आगी लाग जात है। नत्थू बताइस कि बहुतै पूरण तार लाग है तौ टूटत रहत है, यहिसे बहुतै नुकसान होत है। पांच बीघा खेत का नुकसान भा है तौ साढ़े तीन बीघा लिखिन हैं।
तिंदवारी ब्लाक के मूंगुस गांव मा बिजली के शांट सर्किट से आगी लागे की कारन पांच घर जल के राख होइगें हैं।शिवभजन यादव का कहब है कि हम धुंवा देखके आये हन तबै तक पूर सामान जल गा रहा है। मई मा लड़की के शादी रहै तौ शादी का सामान कपड़ा, बर्तन अउर आलमारी सबै आगी मा जल गा है। आगी लागे से घर मा कुछौ सामान नहीं बचा आय। गांव वालेन के मदद से आगी बुझाये हन, एक घंटा बाद फायर बिग्रेड वाले आये हैं।
कानूनगो फूलचन्द का कहब है कि जांच के फाइल बना के दई दीन जई, वहिके बाद मुआवजा मिली।

रिपोर्टर- शिवदेवी
Published on Mar 13, 2018