बांदा जिले में करोड़ों की लागत से बना बस स्टैंड अब खण्डहर बन गयी है

जिला बांदा, ब्लाक नरैनी, कस्बा अतर्रा मा पच्चीस साल पहिले करोड़न रुपिया लगा के बस अड्डा बनावा गा रहै। वा समय परिवहन मंत्री सुरेन्द्र पाल वर्मा बस अड्डा बनवाइस रहै जेहिसे अतर्रा के विकास होइ सकै अउर ट्राफिक जाम न होय।
मड़इन का आवै जाए मा सुविधा होय अउर बेरोजगारन का रोजगार मिल सकै पै प्रशासन के कमी के कारन बस अड्डा जुआरी अउर शराबिन का अड्डा बन के रहि गा है।सानू खान बताइस कि हेंया बस अड्डा बन जात तौ मड़इन का सुविधा होइ जात। काहे से सड़क मा बहुतै ट्राफिक जाम होत है। जाहिर अली का कहब है कि बस अड्डा बने पच्चीस साल से ज्यादा होइ गें हैं, वहिके बिल्डिंग टूट पड़ी है खाली शोपीस बना है जुआ अउर दारू का अड्डा बना है।
अजय भारद्वाज बताइस कि बस अड्डा बनावै मा हमार जमीन लइ लीन गें रहै, तौ हम बर्बादी के कगार मा आ गये हन। हमार हेंया जमीन होत तौ दुकान बनवाइत जेहिसे रोजी रोटी का साधन होइ जात। रमेश गुप्ता बताइस कि मड़इन का हेंया से आव जाए मा बहुतै परेशानी होत है। हेंया के आबादी बढ़ गे है तौ बस अड्डा जल्दी बनावा जायें। परिवहन विभाग के आर एन के के शर्मा का कहब है कि बसअड्डा मेन रास्ता से भीतर बना है यहै कारन वहिका शुरू नहीं कीन गा आय, न शुरू कीन जई। जांच कीन गे रहै, देखा जई वा बिल्डिंग मा बन सकत है।
रिपोर्टर-गीता

Uploaded on Dec 7, 2017