बांदा जिले के गोरे पुरवा में हुई हत्या, आरोप एस.डी.एम. पर

31 दिसम्बर 2017 का अफसार हुसैन के हत्या होइगे है। वहिके परिवार का आरोप है कि या हत्या नरैनी एसडीएम सी.एल.सोनकर बालू के कारन करिस है। बड़े पद मा होय के कारन विभाग के अधिकारी वहिके उपर कारवाही नहीं करत आहीं। या घटना बांदा जिला, ब्लाक नरैनी के गांव गोरे पुरवा के आय। या हत्या के तार अवैध बालू खनन से जुड़े होय का बतावा जात है।
अफसार के मेहरिया सैरून का कहब है कि वहिके गिरफ्तारी होय का चाही अउर सजा भी मिले का चाही।
पड़ोसी इसरार का कहब है कि अफसार के लाश खेत मा पड़ी रहै। वहिके परिवार वालेन का कहब है कि एक मड़ई वहिका गाड़ी मा बइठा के एसडीएम के लगे लेवा गा रहै, बाद मा वहिके लाश मिली है। अफसार का साला मुशर्रफ का कहब है कि बड़ा अधिकारी होय के कारन न वहिका पकड़ा जात आय न कउनौ कारवाही होत आय। भतीजा मोहम्मद आरिफ का कहब है कि हमार चाचा बालू का काम करत रहै। पै वहिके लगे ट्रक अउर ट्रैक्टर नहीं रहै कि मड़ई वहिका बालू माफिया कहे। बालू के काम मा मेहनत मजूरी कइके सौ दुई सौ रुपिया कमात रहै। 1 जनवरी का मुकदमा लिख लीन गा रहै अउर आश्वासन दीन गा रहै कि तुरतै सस्पेंड कइ दीन जई पै येत्ते दिना होय के बादौ कउनौ कारवाही नहीं भे आय। 302 का केस करै वाला आपन पद मा वहिनतान काम करत है या कानून का उल्लघंन आय।

रिपोर्टर- गीता देवी

Published on Jan 16, 2018