बांदा जिले के गोखरही गांव में खुदे गड्ढे और अब निमार्ण कार्य की है खोज

बांदा जिला के ब्लाक तिंदवारी के गोखरही गांव मा एक साल पहिले शौचालय खातिर गड्ढा खोदे गें रहैं, पै अबै तक शौचालय नहीं बने आहीं, यहै कारन हेंया के मड़इन का अबै भी खुले मा शौच जाये का पड़त है।
भगवान दीन बताइस कि एक साल से गड्ढा खोदा पड़ा है। प्रधान कहत है कि अपने से शौचालय बनवा लेव। हमरे लगे खाये खातिर रुपिया नहीं आय तौ शौचालय कहां से बनवाइबै। मिथलेश का कहब है कि हम खुदै एक-एक रुपिया का परेशान हैं कउनौतान आपन घर का खर्चा चलाइत हैं। रामकिशोर का कहब है कि रुपिया नहीं आय तौ कहे मा शौचालय बनवई। रामकरन बताइस कि एक साल से गड्ढा खोदा पड़ा रहै, मटेरियल नहीं मिला तौ पूर दीनेहौं। प्रधान कहत है कि अपने से बनवा लेव खाता मा रुपिया भेज दीन जई। केशकली का कहब है कि हमार गड्ढा भी खोदा पड़ा है। कुछौ मड़इन के बन गें हैं, कुछौ मड़इन के बाकी हैं।
प्रधान अजय सिंह का कहब है कि नियम मा है कि प्रधान अपने से शौचालय बनवा दे, जबै मड़इन के खाता मा रुपिया आ जाये तौ हमें दइ दें।
शौचालय के समस्या के बारें मा बीडीओ बात करै से मना कइ दिहिस है।

रिपोर्टर- शिवदेवी

Published on Feb 21, 2018