बाँदा जिले के नया प्राथमिक स्वास्थ्य केंद्र में ना इमरजेंसी के लिए एम्बुलेंस ना उचित जांच मशीन …

जिला बांदा, ब्लाक नरैनी , कस्बा बदौसा नया प्राथमिक स्वास्थ केंद्र मा बच्चा पैैदा करवावैै वाली औरतन खातिर एम्बूलेंस अउर मरीजन का भर्ती करै खातिर कउनौ सुविधा नहीं आय। या कारन से मरीजन का अतर्रा क़स्बा या फेर चित्रकूट जिला के शिवरामपुर प्राथमिक स्वास्थ केंद्र जाये का परत है।
या मामला मा नया प्राथमिक स्वास्थ केंद्र के फर्माशिष्ट सुशील कुमार कहत हैं कि या नया प्राथमिक स्वास्थ केंद्र है। हेंया बस ओ.पी.डी. है। ज्यादा सीरियस केस नहीं लीन जात हैं। काहे से कि एक्सरे मशीन,एल.टी.अउर बिजली के पर्याप्त सुविधा नहीं आय।
राजेश उपाध्याय का कहब है कि बुखार आवत है। हेंया के डाक्टर दवाई दई देत है,पैै भर्ती नहीं करत आय। मोहिका बहुतै कमजोरी लागत है। अगर डाक्टर भर्ती कई लेत तौ बोतल अउर ताकत के इंजेक्शन लाग जात तौ थोई शरीर मा कमजोरी ना रहत,पै भर्ती करै खातिर कउनौ सुविधा नहीं आय।
यहिनतान कलुआ कहिस कि अगर कउनौ औरत के बच्चा पैैदा होत है तौ वहिका रात बिरात लई जाये खातिर एम्बूलेंस के सुविधा नहीं मिलत। दूसर बात नया प्राथमिक स्वास्थ केंद्र मा हेंया के डाक्टर भर्ती नहीं करत हैं। यहिसे अतर्रा या फेर शिवरामपुर लइके जाये का परत है। या कारन से कउनौ कउनौ औरतन के रास्ता मा बच्चा पैैदा होई जात है।

रिपोर्टर- खबर लहरिया ब्यूरो 

30/08/2016 को प्रकाशित