बाँदा जिला के जबरापुर में आग लगने से छह घर जले

जिला बांदा, ब्लाक नरैनी,गांव जबरापुर मा 19 अप्रैल का अचानक आगी लागै से छह घर जल के खाक होइगे हैं। तेज हवा के फइले से कइयों मड़इन के लाखन के गृहस्थी जलके राख होइगे है। मड़इन के मदद से आगी मा काबू पावा गा है, अधिकारी गांव पहुंचकर आगी लागै के कारन के जांच किहिन हैं।

सियादुलारी का कहब है कि हिंया कउनौ रहबै नहीं भा मैं बस रही हौं। तौ जबै बरै लाग है तो मोर हाथ पकड़ के घसीट के लइगे हैं, दुई जघा जल गई हौं। बड़े-बड़े लोथरा गिरत रहै। हिंया दाल, चावल,गेहूं सब सुलगे लाग रहै। हिंया मधुमक्खी लाग रहै, तौ वहिके मारे अउर नहीं निकरै मिलत रहै। विपिन कुमार मिश्रा बताइस कि नीरज विश्वकर्मा, श्याम किशोर मिश्रा, सियाराम विश्वकर्मा, कौशल किशोर मिश्रा,रमेश ओझा अउर जगदीश विश्वकर्मा इं मड़इन का घर जल गा है। कहूं रहै का जघा नहीं आय अउर प्रशासन कउनौ सुध लेय का तैयार नहीं आय। कउनौ अधिकारी से बात करौ तौ कहत है कि जल गया है तौ वही रहो। हिंया कउनौ व्यवस्था नहीं आय, पै योगी अउर मोदी जी कुछौ कइ सकै तौ मड़इन का आवास दें ताकि मड़इ दुबारा से आपन घर बना के रह सकै अउर आपन जिन्दगी फेर से जी सकै। खाना खाय का नहीं आय मड़इ से एक-एक किलो मांग के खइत है। जउन रहै वा सब जल गा है। अनाज पांच कुंतल चना, तीन कुंतल सरसों, बारह तेरह कुंतल गेहूं, दुई कुंतल चावल हिंया जउन साल भरे के खाय का रहै वा सब जल गा है। कपड़ा तक नहीं बचे आहीं।

धीरज का कहब है कि पड़िया छूटत नहीं रहै तौ रस्सी का काटके छोरे हौं। भैंइस के पूछ जल गे है।

हाबिद हुसैन रजिस्ट्रार कानूनगो तहसील अतर्रा का कहब है कि 20 तारीख का तीन हजार दुई सौ रुपिया मुआवजा दीन गा है।

रिपोर्टर: सुनीता

Published on Apr 24, 2018