बलात्कार करै वाले पकड़ गें

mahila mudda 1 (1)जिला चित्रकूट, ब्लॉक कर्वी। हिंया के 17 साल के एक लड़की के साथै 2 फरवरी सुबेरे 3 बजे बन्द चार पहिया गाड़ी मा सामूहिक बलात्कार का मामला सउहें आवा हवै। पुलिस कानूनी कारवाही करिस हवै।
लड़की का कहब हवै-“मैं अपने जीजा के साथै सतना से कर्वी आई रहौं। चित्रकूट रेलवे स्टेशन से रिक्शा कइके हम घर जात रहन। जइसेन कचहरी के सउहें पहुंचे तौ नीली बत्ती के चार पहिया गाड़ी आई अउर कोतवाली लइ जाये के बहाने से गाड़ी मा बइठा लिहिस। जीजा का हाथ पकड़ के उतार दिहिन। उंई दूनौ मोहिका मानिकपुर के भौंरी गांव लइगें। हुंवा चलत गाड़ी मा बलात्कार करिन अउर भाग गें। मैं हुंवा के मड़इन से जीजा का नाम पता बतायेंव तौ मड़ई जीजा का फोन करिन। जीजा अउर वहिके महतारी मोहिका लइके आय हवैं।”
कर्वी कोतवाली के प्रभारी केशव प्रसाद दुबे कहिन कि बलात्कार करै वालेन का नाम विजय सिंह, कृष्ण कुमार यादव हवै। विजय कुमार बांदा मा रेलवे मा ठेकेदार आय। कृष्ण कुमार यादव इलाहाबाद के कर्छना गांव का रहै वाला हवै। इं दूनौ मानिकपुर आर.पी.एफ. थाना के गाड़ी लीने रहै। वा गाड़ी से आर.पी.एफ. पुलिस 2 फरवरी का बांदा गे रहै। विजय सिंह वा गाड़ी चलावत रहै। उंई गाड़ी का गलत इस्तेमाल करिन। विजय सिंह अउर कृष्ण कुमार के खिलाफ 376 डी (सामूहिक बलात्कार) 366 (झूठ वादा कइके अपहरण करब) धारा लाग हवैं। 4 फरवरी का जेल होइगे हवै।