बढ़ गा किराया

 प्राइवेट बस का इंतजार करत
प्राइवेट बस का इंतजार करत

चित्रकूट जिला के पूर जनता परिवहन विभाग के बसन का किराया बढ़ै से बहुतै परेशान हवै। एक बरस के भीतर तीन दरकी परिवहन विभाग किराया बढ़ाइस हवैं। येत्ती मंहगाई बढ़त जात हवै कि अब तौ मड़इन का बस मा बइठें के पहिले सोंचै का परत हवै। हर पचास किलो मीटर का एक रुपिया अउर सत्तर किलो मीटर से सौ किलो मीटर तक दुइ रुपिया किराया बढ़गा हवैं।
कर्वी के बाबूलाल बताइस कि 12 फरवरी 2014 से परिवहन विभाग फेर से किराया बढ़ा दिहिस हवै। कर्वी से मऊ का बयालिस अउर तैंतालिस रुपिया किराया लागत रहैं तौ अब तैतालिस अउर पंैतालिस रूपिया किराया कइ दीन गा हवै। गरीब मड़इन के तौ मरहीं हवै।
बस अड्डा मऊ मा बइठी लगभग दस सवारी रोड वेज बस का इन्तजार करत रहै। कर्वी आवैं का जबै बस आई तौ कन्डेक्टर कहिस पैंतालिस रूपिया लागी। या सुन के उनका प्राइवेट बस से सफर करैं का परा।
कर्वी परिवहन विभाग के प्रभारी राजेन्द्र सिंह का कहब हवै-“ मोरे हिसाब से किराया मा कउनौ बढोत्तरी नहीं भे आय। डीजल येत्ता मंहगा हवै। या कारन एक दुइ रूपिया तौ बढ़ावा जई। यहिसे जनता का कउनौ नुकसान नहीं आय।”