बढ़ती गर्मी के साथ बढ़ी बिजली कटौती और पानी की किल्लत, चित्रकूट जिले में

जिला चित्रकूट, ब्लाक मऊ, कस्बा मऊ जइसे जइसे गर्मी बढ़त हवै वहिनतान बिजली कटौती बढ़त जात हवै। सरकार बिजली दे का वादा तौ करिस रहै। पै इनतान के बिजली के कटौती देख के पता लागत हवै सरकार आपन वादा केत्ता पूर करिस हवै। 10 हजार के आबादी वाला या इलाका एक महीना से बिजली कटौती से परेशान हवै। बिजली के कारन पानी भी मड़इन का नहीं मिल पावत आय।
मनोज, कृष्ण प्रसाद त्रिपाठी अउर रमेशचंद्र शुक्ला का कहब हवै कि बिजली कटौती का कउनौ समय नहीं आय । सरकार तहसील क्षेत्र मा 20 घंटा बिजली दे का कहिस रहै पै हिंया 14 -15 घंटा बिजली रहत हवै। बिजली कटौती के कारन पानी के समस्या भी आ जात हवै। काहे से पाइप लाइन का पानी भी बिजली के कारन नहीं आवत आय। बिजली कटौती से मड़ई सो नहीं पावत आहीं। छोट छोट बच्चा समेत मेहरिया मनसवा सबै मड़इन का बहुतै परेशानी होत है। बिजली कटौती से धंधा मा भी नुकसान उठावै का पड़त हवैं।
पुनिया बताइस कि गरीब मड़ई बिना बिजली जलावै का बिल भरत हवैं। दुई हजार बिल भरा है 7 सौ फिर आ गा हवै। बिजली रहै चाहे न रहै बिल बराबर आवत हवै।
ओमप्रकाश जाटव अउर आशीष कुमार बताइन कि हिंया 14 घंटा बिजली रहत हवै। सुबेरे, रात दोपहरी हर समय बिजली कटौती होत हवै। विभाग से कहित हन तौ कहत हवै कि ऊपर से बिजली कटौती होत हवै।
बिजली विभाग एक्शियन जगदीश शरण वर्मा का कहब हवै कि शासन कइत से शहरी क्षेत्र खातिर 24 घंटा तहसील मा 20 घंटा अउर गांव मा 18 घंटा बिजली दे का आदेश हवै। हम आदेश पूरा करै के कोशिश करबै।

रिपोर्टर- सुनीता देवी

 

22/05/2017 को प्रकाशित