बजट आ गा-अब गांव मा विकास करवावा जई

vellaga koh vekash nahi copyजिला चित्रकूट, ब्लाक कर्वी, गांव खोह। हिंया के मड़इन का आरोप हवै कि गांव मा कउनौ विकास नहीं आय। या विकास के समस्या से जूझत मड़इन का लगभग बीस साल होइगें हवै। मड़ई विकास करवावैं खातिर प्रधान से लइके ब्लाक तक के अधिकारनि से भी मांग कीने हवैं, पै विकास खातिर कउनौ सुनवाई नहीं भे आय।
गांव के राजू का कहब हवै कि हमरे दलित बस्ती मा लगभग तीस घर हवैं। येत्ते घरन के बीच मा एक हैण्डपंप लाग हवै। वहिका घंटा भर चलावैं के बाद एक बाल्टी पानी निकरत हवै। ऊपर से एक घंटा लाइन लगावैं का परत हवै। या कारन से पानी भरैं के चक्कर मा मड़इन का मजूरी करै अउर औरतन का घर का काम करै मा समय लाग जात हवै। यहिसे दूसर हैण्डपंप होय के जरुरत हवै। काहे से कि एक हैण्डपंप होय के कारन से वहौ आय दिन खराब होत रहत हवै।
शिवलाल का कहब हवै कि गांव मा खड़ण्जा के नाम मा प्रधान एकौ ईंट नहीं बिछवाइस हवै। बारह महीना गली मा कांदौ भरा रहत हवै। जेहिसे मड़इन का बरसात के समय मा गांठिन से कांदौ हइल के निकरैं का परत हवै। कत्तौ कत्तौ तौ छोट लड़का बच्चा अउर बूढ़ मड़ई वहै कांदौं मा गिर जात हवैं अउर चोटा जात हवै। यहिसे उनके कपड़ा खराब होइ जात हवैं।
नत्थू भी कुछ यहिनतान कहिस कि गांव मा पात्र मड़इन का एकौ शौचालय नहीं मिले आय। यहिसे मड़ई मजबूरी मा दुसरेन के खेत मा टट्टी करे जात हवैं। यहिसे जेहिके खेत मा मड़ई टट्टी करै जात हवैं। या गांव नरक बना हवै,पै अधिकरी बी.डी.ओ. कउनौ ध्यान नहीं देत हवैं।
प्रधान ननकी देवी का मनसवा राजकुमार कहिस कि ब्लाक मा नाली,खड़ण्जा,हैण्डपंप सुधरावैं अउर नवा हैण्डपंप लगवावैं खातिर 1 अप्रैल का कहे हौं। गांव मा कुल पैंसठ शौचालय आय हवैं। यहिमा से तीस शौचालय मा काम लाग हवै। कर्वी ए.डी.ओ. रमेश चंद्र गुप्ता कहिन कि खोह गांव मा पानी का लेबल नीचे चला गा हवै। गांव मा विकास का काम करवावैं खातिर सरकार कइती से आठ लाख तैतालिस हजार रुपिया आ गा हवै। यहिमा नाली,खड़ण्जा बनवावा जई।

रिपोर्टर: नाजनी रिजवी