फसल खराब होय के सदमा लागें से मोत

बच्चन खे साथे हेमा
बच्चन खे साथे हेमा

जिला महोबा, ब्लाक पनवाड़ी, गांव रिछा। एते के नरेन्द्र पुत्र प्रकाश अरजडि़या की फसल खराब होय खे कारन सदमे से 5 सितम्बर 2014 खा मोत हो गई हे। ऊखे परिवार में दुख को माहोल हे।
नरेन्द्र की मताई रामकुमारी ने बताओ कि नरेन्द्र 4 सितम्बर खा सुबेरे खेत देखे गओ हतो। हमाये खेत में मूंग, उड़द ओर तिली बोई हती। जोन पूरी तरह से खराब हो गई हे। नरेन्द्र खेत से लौट के घरे आओ तो न खाना खाओ ओर न कोनऊ से बात करी। अचानक नरेन्द्र की तबियत बिगड़ गई। जीखे दवाई कराये खे लाने पनवाड़ी के सामुदायिक स्वास्थ्य केन्द्र ले गये। ओते से 5 सितम्बर खा झांसी रिफर कर दओ। झांसी ले जात समय ऊखी रास्ते में ही मोत हो गई।
नरेन्द्र की ओरत हेमा बताउत हे कि मोये तो कछू समझ में नई आउत की इत्तो जल्दी जा सब केसे हो गओ। दवाई कराये तक खा मौका नई मिलो आय। में ओर मोये बच्चा बेसहारा हो गये हें।
पनवाड़ी सामुदायिक स्वास्थ्य केन्द्र के चिकित्सा अधीक्षक डाक्टर के.पी. सिंह बताउत हें कि नरेन्द्र नाम खा कोनऊ मरीज दवाई कराये खे लाने नई आओ हे।
कुलपहाड़ एस.डी.एम. मोहम्मद रिजवान बताउत हें कि अगर नरेन्द्र के परिवार केती से कोनऊ दरखास देय आहे तो उपचुनाव के बाद ऊखे परिवार खा कछू सरकारी मदद दिबाये खे कोशिश करी जेहे।