प्रधान से कालोनी के मांग

दूसर किस्त बिना अधूरी कालोनी
दूसर किस्त बिना अधूरी कालोनी

जिला बांदा, ब्लाक बड़ोखर खुर्द, गांव तिन्दवारा, मजरा जमुनी पुरवा अउर तिन्दवारी ब्लाक का चिल्ला कस्बा। इं गांवन मा कालोनी तौ आई हैं, पै सब कालोनिन का रूपिया न मिलैं से बहुतै लोगन कि कालोनी नहीं मिली आय। कुछन का दूसर किस्त नहीं मिली तौ कालोनी अधूरी परी हैं।
जमुनी पुरवा का भइयालाल, मिंता अउर रामसनेही का कहब है कि उनके एक भी खेती निहाय। कच्चे घरन मा रहत हैं। या मारे उंई कालोनी पावैं के पात्र हैं, पै प्रधान उनका कालोनी नहीं दिहिस आय। यहिके पहिले भी कइयौ दरकी कालोनी मांगत चले आये हन। प्रधान अनिल कुमार कहत है कि कुल 300 कालोनी आई हैं। 100 कालोनी का रूपिया आ गा है, तौ मड़इन का बांट दीन गा है। 200 कालोनी का रूपिया अबै बाकी है। जबै अई तौ दीन जई।
चिल्ला कस्बाा वार्ड नम्बर 6 के कल्लू, बल्लू अउर रमधनिया का कहब है कि उनका दूसर किस्त न मिलै से कालोनी अधूरी हैं। अगर दूसर किस्त मिल जात तौ छत डाल लेतेंन। रहै का होई जात नहीं तौ बरसात महीना कहां रहिबे।
प्रधान इन्दी देवी के मनसवा बिन्दा का कहब है कि जेतनी कालोनी है उनके फोटो खिंचा के ब्लाक मा जमा कई दीन गे है। अब जांच होय के बाद दूसर किस्त का रूपिया मिली आय।