प्रजापति मोहल्ला मा नाली के मांग

मोहल्ला के हालत
मोहल्ला के हालत

जिला बांदा, ब्लाक महुआ, गांव महुआ। हेंया वार्ड नम्बर 2 अउर 3 के तीन गलिन मा नाली न होय से कीचड़ भरी रास्ता से मोहल्ला वासी गुजरैं का मजबूर हैं। या समस्या मड़ई बीसन साल से झेलत है।
श्यामकली, सुशीला अउर सुखदेव कहत हैं कि 2 अउर 3 वार्ड मा लगभग दुई सौ घर हैं। सबै प्रजापति जाति के आहीं। प्रधान से आपन समस्या कइयौ दरकी बता चुकेन, पै वा देखैं नहीं आवत आय। कहत है कि तुम मोहिका वोट नहीं दीने आहू। हमार मोहल्ला मा नाली न होय से इनतान के ठंडी मा बारिश का पानी भरा है वहिसे निकरत हन। नरदन मा गड्ढ़ा खोद के बड़े-बड़े डिब्बा धरे हन। घर के निस्तार का पानी रोज बाहर फेंकै जइत है। घरन मा आज के आई बहू भी नहीं नहा सकत आय। या फेर वहिकर नहावा पानी घर से बाहर फेंकै का परत है।
वार्ड नम्बर 2 का मेम्बर बिहारी कहत है कि प्रधान से दुई एक बार कहा है वा नहीं सुनत। या मारे हम आपन काम सीधे विधायक निधि से करावत हन। विधायक निधि हमार मोहल्ला के नाली पास है। बजट आवै के बाद बन जई।
बी.डी.ओ. आर.डी. यादव कहत है कि गांवन का बजट मंगावब अउर काम करावब प्रधान के ऊपर है। प्रधान का जहां जरूरत समझ मा आवत है होंआ खुदै काम करावत है। अगर इनतान के बात है, तौ प्रधान से कही दीन जई।