पैसा लइके इलाज करै कै आरोप

Exif_JPEG_420जिला अस्पताल फैजाबाद। हिंआ डायरिया से परेशान मरीज कै आरोप बाय कि स्टाफनर्स डाक्टर लापरवाही से पेश आवाथिन अउर डिस्चार्ज करै के ताई पैसा लियाथिन।
सुनीता दूबे, आसमा बानों अउर गुड्डी देवी बताइन कि हमरे सबके गेदहरा का डायरिया भै बाय। इलाज के ताई भर्ती करे हई। सुबह शाम आइके देख लियाथिन बाकी बीच मा अगर फोन करा की तबीयत खराब बाय तौ नाय अवतिन। बिस्तर बदलै खातिर कहे पै कहाथिन खुद बदल लिया। अउर बाहर से दवाई लिखाथिन अगर पूंछा जाथै कि हिंआ लांच काहे नाय हुवत तौ कहाथिन कि हिंआ के मशीन मा सही रिपोर्ट नाय आवत। जबकि मनई ई सोंच के हिंआ आवाथै कि सारी सुविधा मिले। पर हिंआ पै सब प्राइवेट पै निर्भर बाय। जब पैसा न दिया तौ ऊपर से कउनौ सुनवाई नाय हुवत।
जिला अस्पताल कै प्रमुख अधीक्षक डाक्टर हरिओम श्रीवास्तव बताइन कि अगर मरीजन से पैसा लियै कै सूचना मिलाथै तौ हम यकै जांच कराउब। मरीजन से पैसा लियब गलत बाय।