पूरो सामान जर के राख, लाखन को नुक्सान

M aag ki photoजिला महोबा, ब्लाक जैतपुर, कस्बा कुलपहाड़। एते 7 अगस्त खा मोहम्मद नसीर अंसारी के दुकान में बिजली के तार से आगी लग गई हती। जीमें छह लाख को नुक्साना भओ हे। तसीलदार ओर लेखपाल जांच करन गये हते।
मोहम्मद नसीर अंसारी बताउत हे की रोज के जेसे में 7 अगस्त खा भी आपन जूता चप्पल की दुकान बन्द करके घर चलो गओ हतो। रात 11 बजे कुलपहाड़ कोतवाली ने फोन करके बताओ। एई दुकान से मोओ पूरो परिवार चलत हतो। अब परिवार पाले खा कोनऊ चारा नइयां।
लेखपाल अशोक कहत हे कि हमने रिपोर्ट लगा के तहसील में जमा कर दई हे। जा तो सासन के एते से निधारित हो हे की कभे ओर कित्तो मुआवजा दओ जेहे।
एसई कबरई, गांव बिलबई मे गोविन्द बताउत हे कि हम सब जने 5 सितम्बर खा खेत गये हते। तभई ज्यादा बोल्टेज आयें के कारन पूरे घर में अचानक आग लग गई हे। आग बुझायें के लाने क्रान्ती गई हती। ऊ भी पूरी तरह से जर गई हे। जीखो इजाल महोबा जिला अस्पताल में चलत हे। आगी में मोओ तीन लाख नगद रूपइया घर गृहस्थी को सामान ओर जेवर जर के राख हो गये हे। खायें के लाने मोहल्ला को आदमी खाना देत हे।
लेखपाल जयराम कहत हे कि मेने मुआयना करो हे ऊखो सचमुच में बोहतई नुक्सान भओ हे। परिवार गहरे सदमा में हे, मेने रिपोर्ट लगा के तहसील में दे दई हे। दैविय आपदा के तहत मुआवजा दिबाओ जेहे।