पुलिया बने की मांग

puliya

जिला महोबा, ब्लाक चरखारी, गांव सलुआ। ऊसई देखो जाए तो हर गांव में निकरे खे रास्ता बनी हे। पे ई गांव में एक गांव से दूसरे गांव जाए खे रास्ता में पुलिया परत हे। जीमें पाइप परो हे। बरसात होत हे तो नदी में पाइप डूब जात हे। जीसे निकरे में बोहतई परेशानी आउत हे।
ग्यासीलाल, मयकू, देशराज, ओर महेश ने बताओ कि हमाए मरघटिया मोहल्ला में बीस साल से पाइप से निकरे खे समस्या हे। एई गली से हमे कबरई जाने परत हे। कबरई जाये खा एकई रास्ता हे। ऊमे भी पुलिया न बन खे एकई पाइप परो हे। जीसे मोटर साइकिल निकरत हे। बरसात में नदी आ जात हे, जीसे पाइप पानी में डूब जात हे। हमें एई से निकर खे जाने परत हे। रात बिरात निकर खे आएं जाएं मे बोहतई परेशानी आउत हे। प्रधान भागीरथ प्रजापति ने बताओ कि हमाए गांव की आबादी दो हजार वोटर बारह सौ हे। तीन दइयां पाइप खे ऊपर माटी डरवा खे पुलिया बनवा चुको हो। पे जभे बरसात होत हे तो पुलिया ऊसई खे ऊसई हो जात हे। मेने एक साल पेहले विधायक रज्जू बुधौरिया खे प्रस्ताव बनाके दओ हतो। जिला पंचायत निधी को भी प्रस्ताव दओ हे। पे अभे तक कोनऊ सुनवाई नई भई आय। जिला पंचायत निधी से एक रास्ता छह महीना पेहले पास हो गई हे, पे ऊखो भी बजट नई आओ जीसे ऊ रास्ता भी एसई परो हे।