नई हे नाली

mahoba gaon

जिला महोबा, ब्लाक कबरई, गांव पचपहरा। ई गांव मे सफाई ओर नाली न होय से एते के लोगन खां बोहतई परेशानी उठाउने परत हे।
एते खें साहू मोहल्ला में रहें वाली गीता शोभारानी, प्रथ्वी ने बताओ कि हमाये ई मोहल्ला में नाली नई बनी आय। दूसरों मोहल्ला में बनो कुआं में लोग नहात हे ओर कपड़ा भी धोउत हें जीसे ओते खां पानी हमाये मोहल्ला में आउत हे ओर नाली न होय से हम लोगन खें दुआरे पे फैल जात हे। जीसे हम लोग बेठ भी नई पाउत हें । पानी भर जात हे ऊखी कोनऊ सफाई भी नई करत आय हम अपने -अपने द्वारे पे खुदई सफाई कर लेत हे। अगर सफाई न करें तो बोहतई गन्दो लगत हे ओर मच्छर भी लगत हें। जीखे काटे से बीमारी फेलत हे। ग्यासी राम साहू ओर शेखपाल ने बताओ कि नाली न होय से घर की ओरतन खां नहाय में भी बोहतई परेशानी आउत हे। काये से पानी फैले के कारन हैण्डपम्प पे ही नहाने परत हे।
प्रधान तुलसारानी को लड़का तेजप्रताप ने बताओ कि ईखे लाने स्टीमेट तैयार हो गओ हे। जेसे पास हो जेहे तो नाली बनवा दई जेहे। बी़डी.ओ  डी पी वर्मा ने बताओ कि जभे बजट आ जेहे तो नाली बनवा दई जेहे।