पानी खां तरसे

taza paani mahoba

जिला महोबा, ब्लाक जैतपुर, गांव अजनर। एते कोरियाना मोहल्ला वार्ड नम्बर सात में पानी की बोहतई परेशानी हे। आदमियन खां साइकिल बैलगाड़ी या फिर ट्राली में पानी भर के तीन किलोमीटर दूर खेतन से लाए खां परत हे।
गांव के बीरसिंह, बालचन्द्र, रामबाबू, राकेश, ओर इन्द्रपाल ने बताओ कि हमाए एते पानी की सबसे ज्यादा परेशानी हे। गर्मियन में तीन किलोमीटर दूर खेतन से साइकिल या बैलगाड़ी से घर में पानी लाए खें परत हे। एते टंकी बनी हे, पे ऊखी पाइप लाइन वार्ड नम्बर चार तक हे। जिते तक पाइप लाइन हे ऊमें भी लाइट होय के बाद भी पानी नई चलावत आय। हमाए इ मोहल्ला में एक हैण्डपम्प हे। पहले कुआं हते जो अभे सूखे पड़े हें  ओर हैण्डपम्प भी इ समय पानी नई देत आय। हम सोचतहें  कि पूरे गांव में पाइप लाइन हो जाय ओर लाइट होय पे पानी चलाओ जाय तो पानी की इत्ती परेशानी न उठाउने परे। ईखे लाने प्रधान से केऊ दइयां  कहो हे, पे कोनऊ सुनवाई नई होत आय।
प्रधान धरमपाल सिंह ने बताओ कि एते टंकी भी बनी हे ओर पाइप लाइन भी बिछत हे। ओते ऊंचाई होए खें कारन पानी नई पोहच पाउत हे। टंकी अगर दस फुट ऊंची होती तो पानी पोहच जातो। हम ओते पानी पोहचाए की पूरी कोशिश करत हे।
जल निगम जेई ए.के. बौद्व ने बताओ सरकार को पूरो रूपइया नई आओ हे। एई से पूरे में पाइप लाइन नहीं बिछी। जभे शासन से पूरो रूपइया आ जेहे तो पूरे गांव में  पाइप लाइन बिछवा दई जेहें । जा काम कराए मे लगभग छह महीना लग जेहें।