पत्थर से कुचल के हत्या

ठाकुरदीन का घर अउर परिवार
ठाकुरदीन का घर अउर परिवार

जिला बांदा, ब्लाक नरैनी, ग्राम पंचायत सढ़ा, मजरा आनंदपुर। हेंया 55 साल के ठाकुरदीन के 15 सितंबर 2014 का रात मा पत्थर से कुचल के हत्या कई दीन गे। वहिका लड़का नत्थू गांव के ही भूरा अउर हीरालाल के खिलाफ कालिंजर थाना मा नामजद रपट लिखाइस है।
ठाकुरदीन के चाची मुन्नी बताइस-“ठाकुरदीन के जउन दूसर मेहरिया मुन्नी है वहिके भाई भूरा से जमीन का कुछ विवाद चलत रहा है, पै इनतान के घटना होय के कउनौ शंका नहीं रही आय। 15 सितंबर के रात वा घर के बाहर वाले कमरा मा सो गा है। जबै सुबेरे सब कोऊ जागा तौ ठाकुरदीन आपन खटोली से गायब रहै। गांव मा हड़कम मच गा अउर ठाकुरदीन का ढूढ़ै लाग। घर से कुछ दूर मा कुंआ के पास खेत मा टार्च, चप्पल अउर डिब्बा मिले हैं अउर कुछ दूर जाय मा महुआ के पास खेत मा पत्थर से मुंह कुचली लाश मिली है। पुलिस मउके मा आ के लाश का पंनामा कइके पोस्टमार्टम खातिर जिला अस्पताल भेज दिहिस रहै।”
भूरा के मेहरिया सत्यवती कहत है कि मोर अउर ठाकुरदीन का खेत अगल बगल हैं। मोरे खेत मा एक बिगहा जमीन का नम्बर ठाकुरदीन के खेत मा निकरत रहै अउर वहिके खेत मा मोर जमीन भी एक बिगहा घुसी है। ठाकुरदीन आपन जमीन नपा के बेच लिहिस रहै। हम अबै नहीं नपा पावा, पै लड़ाई कउनौ नहीं रही। मोरे मनसवा का झूंठ फंसवा गा है।
कालिंजर एस.ओ. एम.पी. वर्मा कहत हैं कि उनका मुकदमा लिख गा है। हत्या के धारा 302 लाग है। 17 सितंबर का हीरालाल अउर भूरा का गिरफ्तार कइके जेल भेज दीन गा है ।