नियाव लइके रहिहौं

जिला चित्रकूट, ब्लाक कर्वी, कस्बा शिवरामपुर, अमीन का पुरवा। हिंया के इन्द्रवती के लगभग साठ फुट जमीन मा प्रधान शिवबरन कपडि़या प्राथमिक स्कूल बनवावैं मा लइ लिहिस अउर तीन आम के पेड़न के डार कटवा दिहिस हवै। या समस्या डेढ़ बरस से हवै। यहे से वा एस.डी.एम संजीव सिंह का 5 मार्च 2014 का लिखित दरखास दिहिस।
या समस्या का लइके कर्वी एस.डी.एम संजीव सिंह का कहब हवै कि या मामला के जांच कीन जई। जउन सही होइ तौ वहै होइ।
पुरवा के इन्द्रवती का कहब हवै कि गरीब अउर विधवा मेहरिया हौं। मनसवा चुन्नीलाल का मरे चार बरस होइगा हवै। अपने जमीन मा घर बना के रहत हौं। प्रधान शिवबरन साठ फुट जमीन लइ लिहिस हवै। वा कहत हवै कि जमीन ग्राम सभा के हवै। प्रधान अपने बिरादरी वालेन का जमीन दें खाातिर सोंचत हवै। आम के पेड़ जमीन मा लाग हवै। कहत हवै कि जमीन अउर पेड़ हमार आय। या कारन मैं परेशान रहत हौं। नियाव पावैं खातिर दर-दर भटकत हौं, पै मोहिका नियाव नहीं मिलत हवै।
प्रधान शिवबरन कपडि़या का कहब हवै कि वा पुरवा मा प्राथमिक स्कूल नहीं रहै। लगभग पांच सौ मड़इन के बच्चा पढ़ै खातिर हिंया हुंवा भटकत रहैं। यहै से स्कूल बनवाये हौं। जउन जमीन मा स्कूल बना हवै। वा इन्द्रवती के जमीन नहीं हवै। ग्राम सभा के जमीन हवै। आम के पेड़ के डार छटवाये रहौं। काहे से कि स्कूल के दीवार से छुवत रहैं। इन्द्रवती अइसेन परेशान करैं मा लाग हवै।