नियाव खातिर अनशन

धरना मा बइठ परिवार
धरना मा बइठ परिवार

जिला बांदा। देहात कोतवाली क्षेत्र पचनेही गांव का रामबाबू आपन पूरे परिवार साथै 6 अगस्त 2014 से आमरण अनशन मा बइठ गा है। वा कहत रहै कि जबै तक नियाव न मिली तबै तक अनशन करबे।
रामबाबू बताइस-“13 जून 2014 का गांव के रामराज के लड़का प्रेमचन्द्र, हरिश्चन्द्र, श्रीचन्द्र, दामाद निर्भय सिंह गौतम (कोटेदार) अउर नाती बल्दू उर्फ योगेन्द्र सिंह, चिक्की मोरे परिवार के साथै मारपीट करिन। काहे से प्रेमचन्द्र अउर निर्भय सिंह से मैं आपन मेहरिया का छेड़खानी करैं से बचावत रहौं तौ हल्ला सुन के इं सबै जन आ गें। मोहिका अउर मोरे महतारी व मेहरिया का बहुतै मारिन हैं। गांव के मड़ई न बचावत तौ उंई हमैं जान से मार डारत। मैं देहात कोतवाली मा रपट लिखावैं गयेंव तौ एस.ओ. अनीता सिंह चैहान रपट न लिख के समझउता का दबाव डारत है। कउनौ कारवाही न होय से पूरे परिवार के साथै बंादा अशोक लाट तरे 6 अगस्त 2014 से अनशन मा बइठ गये हौं।”
एस.ओ. अनीता सिंह चैहान का कहब है कि पानी भरैं खातिर बच्चन के बीच लड़ाई भे रहै। बच्चन के लड़ाई मा बडे़न से लड़ाई होइगे। छेड़खानी नहीं भे आय। या मारे समझौता करैं का कहा जात है।
एस.पी. अमित वर्मा कहिन कि अबै तक मोर पास दरखास नहीं आई आय। अगर अई तौ जांच के बाद कारवाही कीन जई।