नहीं भा आय कउनौ विकास

k taja amanpurजिला चित्रकूट, ब्लाक कर्वी, गांव अमानपुर, मुहल्ला कुम्हारन बस्ती। हिंया प्रधान दिनेश कुमार का पांच साल होइगे, पै बस्ती मा कउनौ विकास नहीं करवाइस हवै। बस्ती के बच्ची अउर रमेश का कहब हवै कि हमरे बस्ती मा नाली नहीं बनी आय। मड़इन के घरन के निस्तार का पानी रास्ता मा भरा रहत हवै। बरसात के समय पानी घरन के भीतर घुस के आवत हवै। मिथला कहिस कि प्रधान दिनेश कुमार का वोट लें का रहैं तौ हाथ जोड़त रहै, पै जीतैं के बाद मुड़ के नहीं देखित हवै। बस्ती मा खड़ण्जा नहीं बनवाइस हवै। गर्मी मा धूल उड़ के खाना अउर पानी मा परत हवैं। गंदगी रहत हवै। यहिसे बीमारी फइलै का डेर बना रहत हवै। बस्ती वालेन का एकौ कालोनी नहीं दिहिस। पानी के सुविधा खातिर हैण्डपम्प नहीं लगवाइस। लगभग आधा किलो मीटर दूर गांव के भीतर पानी भरैं हैण्डपम्प जइत हन। प्रधान दिनेश कुमार का कहब हवै कि मड़ई खड़ण्जा बनवावैं मा अपने चबूतरा नहीं तोडैं देत हवै। हैण्डपम्प लगवावैं खातिर ब्लाक मा कइयौ दरकी कहे हौ, पै पास नहीं भे हवैं। अपने से तौ हैण्डपम्प न लगवा देहूं। बजट केत्ता आवा या नहीं बता सकत हौं।
सी.ड़ी.ओ. मुजाहिदुल अहसन का कहब हवै कि चुनाव के बाद गांव मा जांच कराई जई। जांच मा अगर सही पावा गा कि बस्ती मा विकास नहीं आय तौ प्रधान के खिलाफ कारवाही कीन जा सकत हवै।