नहीं पहुंचत घर मनी आर्डर

b maniardar2जिला बांदा। डाक घर के लापरवाही के चलत किसानन के घर मनी आर्डर नहीं पहुंचत आय। 14 नवम्बर 2015 का हिन्दुस्तान किसान यूनियन का सदस्य डाक विभाग का चेतावनी दिहिस कि अगर समय से मनी आर्डर न पहुंचिहैं तौ उंई डाक अधीक्षक कार्यालय का घेराव करिहैं।
लामा गांव का किसान सुखदेव बताइस कि वहिकर लड़का मुम्बई मा कमात है। वा मनी आर्डर से रूपिया भेजिस है। डाक विभाग एक महीना गुजर जाय के बाद भी रूपिया घरै नहीं भेजिस आय। नंदना गांव के सुरेश उर्फ जग्गू कहिन कि मोर लड़का भी हरिशरण एक महीना पहिले रूपिया मनी आर्डर से भेजिस। आज तक वा रूपिया लंे का दउरित हन। कतौ कम्प्यूटर खराब है तौ कतौ नेटवर्क निहाय का बहाना कइके लउटा देत हैं। हिन्दुस्तान किसान यूनियन के राष्ट्रीय अध्यक्ष सुरेन्द्र तिवारी कहिन कि दैवीय आपदा से पस्त किसान एक एक रूपिया का मोहताज है। उनके परिवार के लोग परदेश से कमा के भेजत हैं, पै उंई घर नहीं पहुंचत आय। प्रधान डाकघर मा कम्प्यूटर से इलेक्ट्रानिक मानी आर्डर का काम ठप है। यहिके अलावा भी नौकरी खातिर काल लेटर का वितरण पोस्टल आर्डर के काम, डाक टिकट का न होब आय दिन सर्वर न होय जइसे के समस्या हैं। ऊपर से खाता धारक का कर्मचारियन के खराब व्यवहार का शिकार होय का परत है।
प्रधान डाकघर पोस्ट मास्टर आई.डी. लखेरा का कहब है कि स्टाप के कमी के चलत सब व्यवस्था ठीक ठाक हैं।