नई भओ प्रधान को सपथ ग्रहण

जिला महोबा, ब्लाक जैतपुर, गांव भदरवारा। एते के प्रधान सिंगार दुलाइया को अभे सपथ ग्रहण नई भओ हे। जीसे गांव के विकास में बोहतई असर परो हे। आदमी योजना को लाभ पायें खा भटकत हे।
मुन्नीलाल, टुटियां ओर अमन कहत हे की हमाये एते जानवरन खा पानी की बोहतई परेशानी हे। दूसरे गांवन में पानी खा चराही बनी हे, हमाये गांव में बूंद-बूंद पानी खा भटकत हे। प्रधान से कहत हें तो ऊ कहत हे की में अभे कछू नई कर सकत हों। भदरवारा को मजरा टिकरिया को मुकुन्दी लाल कहत हे की तालाब सूखे परे हे, रास्ता खराब हे। जीसे निकरें में परेशानी होत हे।
प्रधान को लड़का कपिल कहत हे की गांव में ग्यारह वार्ड हे। जीमें चार वार्ड मेम्बर बने हे। पेहले कोनऊ ने ध्यान नई दओ हे। सात वार्ड मेम्बर को चुनाव बाकी हे। जभे वार्ड मेम्बर को चुनाव हे तभई हमाओ सपथ ग्रहण हो सकत हे। सपथ ग्रहण के बिना हम कछू नईं कर सकत हे।
बी.डी.ओ. एस.के. सिंह बताउत हे की बिना सपथ ग्रहण वालेएसे नौ गांव हे। 14 फरवरी खा चुनाव वार्ड मेम्बरो के होने हे। ओई की तैयारी करी जात हे।