नई बने एन.पी.आर. कार्ड

कार्ड बनवायें खा ठाड़े
कार्ड बनवायें खा ठाड़े

जिला महोबा, ब्लाक कबरई, गांव पचपहरा। एन.पी.आर. कार्ड (राष्ट्रीय जनसंख्या रजिस्टर) बने खा 2 सितम्बर 2013 खा बने को आदेश आओ हतो। पे पचपहरा में 6 अक्टूबर 2013 से 8 अक्टूबर 2013 तक एन.पी.आर. कार्ड (राष्ट्रीय जनसंख्या रजिस्टर) बने हें। जीमें कछू आदमियन के कार्ड नई बने आय। ऊं आदमियन को आरोप हे कि कार्ड बनाये खे लाने तीन दिन को समय बोहतई कम हे।
दुली, रामदेवी, ओर बीरसिंह के साथे आठ आदमियन ने बताओ कि हमाये गांव में आधार कार्ड के जेसे एन.पी.आर. कार्ड (राष्ट्रीय जनसंख्या रजिस्टर) बने हें। जीमें हमाये नाम नई लिखे आय, जीसे हमाये कार्ड नई बन पाये हें। सरकार आदमियन के लाने कोनऊ न कोनऊ कार्ड बनवाये कि योजना चलाउत रहत हे, पे समय तीन दिन को दओ जात हे। जोन बड़ी ग्राम पंचायत के लाने बोहतई कम हे। हम गरीब आदमी सुबेरे नौ बजे से आपन घर को काम छोड़ के तीन दिन से रोज कार्ड बनवाउन गये हे, पे हमाओ ध्यान कोनऊ ने नई दओ आय।

कार्ड बनाये वाले लखनऊ से आये ठेकेदार मोहम्मद मसूर सिद्दीकी बताउत हे कि हमाओ कार्ड बनाये को तीनई दिन को ठेका होत हे। जीखे कार्ड अभे नई बने ऊखे कार्ड तीन महीना बाद दुबारा से बनाये जेहें।

   रजिस्ट्रार कानूनगो के.आर. अहिरवार ने बताओ कि एन.पी.आर. कार्ड (राष्ट्रीय जनसंख्या रजिस्टर) भारत सरकार बनवाउत हे। जीमे कार्ड के आधार पे जनसंख्या की गिनती करी जेहे। ऊखे समय बढ़ाये के लाने हम कछु नई बता सकत हें। एस.डी.एम. सत्यप्रकाश राय ने बताओ कि समय बढ़ाये के लाने सी.डी.ओ. कछू कर सकत हें।