द्वारचार मा खूनी लड़ाई

जिला बांदा, ब्लाक बिसण्डा, गांव पबइया का मजरा भुराने पुरवा। हेंया 27 अप्रैल का द्वारचार के समय कम दहेज का लइके घराती अउर बराती के बीच मारपीट भे है। आखिर मा लड़की के शादी कइके ससुराल भेज दीन गा है।
गांव का विजय पाल का कहब है-“मोर भतीजी प्रीती के बारात तिंदवारी ब्लाक के मुंगुस गांव से आई। दस बजे रात मा द्वारचार होत रहै। हम वा समय छह हजार रुपिया देत रहन। बाराती सुदामा अउर राजाराम मोटर साइकिल अउर छह हजार रूपिया मांगै लाग। हम यतना दें से मना कई दीन तौ गाली गलौज के साथै मारपीट मा उतर आये। हमार मार के खोपड़ी फोड़ दिहिन। जान से मार डालैं के धमकी दिहिन। बबेरू कोतवाली मा रपट कीन। आखिरकार पुलिस के देखरेख मा शादी भे है।”
सुदामा कहिस कि दहेज कम दिहिन ऊपर से गाली गलौज करैं लाग। या मारे लड़ाई के साथै मारपीट भे है।
बबेरू कोतवाली के मुंसी अमरेन्द्र प्रताप कहिन कि सुदामा अउर राजाराम के खिलाफ 28 अप्रैल का मुकदमा लिख गा है। मुकदमा मा मारपीट के धारा 323, गाली गलौज के 504 अउर जान से मारै के धमकी मा 506 लाग है।